Bie de gement hebbe ze ut in de goate!
Want wo kunde bèter zitte dan in ut leukste gat van Nederland!
Ich zie ut al vur mich:
Alle meense van de gement die zich tot doel gesteld hebbe um zich in te zette vur ut gewone seempele volk.

Ammel biën in de burt van de vertrouwde umgèving: Doa wo Cranendonck honderden joare geleje gestalte kreeg. Bie ut kustilke en de bossen doa achter.
Eindeluk kunne die meense zich volledig storte op hun taak. Zonder dezze horendol wore van ut weenkelend gewone seempele volk dè Buul vol mej wages zet.
Nieje, die meense moete in alle reust hun eige bezig kunne hawwe mej ut bedeenke van dinge die ut lève èngenaam make. Zonder noa te hoeve deenke over dinge die toch alliën mer aafleije, zoeas un bibliotheek, subsidie vur veriëniginge, platsen um carnavalswages te bouwe of neffe un treinstation nog un buslijn.
Joarelang heb ich gedaacht detter niks vur Zurrik gedoan zou wore en eindeluk zien mien gebede gehuurt:
Ut gementehoes in Zurrik! Tis toch geweldig! Dè ich dè nog mej mag make.
Okee, ut kost wel un poar cente, mer dan hedde och iets.
(En dan wet ut gewone seempele volk in Buul och us wa det is um noa un aander dörrep te moete rieje as ze iets noëdig hebbe.)
Toen ich ut huurde was ich werkeluk dolgelukkig.
Ich haaw efkes zoeiets van:
Misschien kumt er straks nog wel iemut op ut idee ut zwembad op Cranendonck in zien oorspronkeluke staat terug te brengen. Dan kunnen al die toppers tusse de middag efkes los van alle stress un paar bantjes zwemme ummer wel vol tiggenèn te kunnen smiddus.
Hiël misschien maag ut gewone seempele volk dan nog wel efkes kome zwemme.
In de urkes dè ut brein zich de mest vernuftige systemen oetdeenkt um hie ut paradies op aarde te make.

As ut gewone seempele volk teminste de pries wille betoale vur dit geweldige idee.
(Want zeg nou zelf; ut gewone seempele volk bedeenkt niks, ut gewone seempele volk makt niks vur de gemenschap en as er dan iets bedaacht wurd vur ut gewone seempele volk, dan wil ut gewone seempele volk ‘r mestal nog ni ens vur betoale!)

HOE-IST?

Wa zegde Zarathustra?
 

Now hebbe we alwer un paar wèke un keunstwerruk in Zurrik. Hartstikke moi gemakt.
Un verroesde ploat mej ammel kruuskes in gestansd. Die kruuskes vörme bie mekoar de plattegroond van Zurrik. Onder die verroesde ploat zit un tl-lèmpke en un iezerdruike zoedè ut soaves verlicht is.

Tiggeworig kunde op internet zoe ontzettend veul koëpe en bestelle tigge belachelik leg prieze, mer keunst blieft, onder os gezigt en gezwege, èn de pries. Dè kumt umdè ge bie keunst gen ding kopt, mer ut verhaal erumhenne. Mestal zien die keunstwerreke dingen die unne klenne van drej joar kan make. Ut verschil is dè unnen klenne van drej joar er gen verhaal bi-j wet te vertelle. Hoe ingewikkelder ut verhaal erbi-j, hoe durder ut keunstwerruk. Dus wie waanzinnige verhalen ophangt kan ut beste keunstenaar wore.
Ut keunstwerruk woor dor de keunstenaar mej de bus gebroacht! Vanoet Eindhoven!
Now zulde zegge doa is toch gen keunst èn um mej de bus van Eindhoven te kome.
Nieje, op dit momeent nog ni, mer ovver ni al te lange tied dan moedet MARES probere!

Hie hebbe we unne wethawwer die van ut stasjon in Moares stillekesèn un keunstwerruk makt.
Ut get nimmer um ut ding mer um ut verhaal erumhenne!

Keunstig gemakt?
HOE-IST?
Keunstig gedoan!

Hure, zeen en zwiege. Dè is tiggeworig ut devies.
As ge toch bekiekt watter ammel um uch henne gebeurd. Ni te snappe. Bus- en taxisjofeurs in mekoar geslage, Pliesie en zekewagepersoniël bedreigd, keie goje noa de brandweer, Lerare peste, zoemèr meense steke mej un mes, friettenten overvalle op klaorlichten daag, tuffe as ge voorbi-j gefietst komt,uch oetmake vur rotte vis mej de mest verschrikkelukke ziktes, mishandelinge, vernelerij, gebakkes noa elkoar in d’n auto, mej de moter over ut la-nd jakkere, heun los loate loëpe, katte overal behalleve bie ut baasje, contèners umtrekke, voelusbèk ènstoke, auto’s bekrasse, verkeersborde weghoale.
Ich zal ‘r mer over zwiege.

Hoe ist?
Proat ‘r mich ni van!

Nottörluk!
De zon begint wer te schiene en dan kome ze ammel wer ‘t hoes oet!
Veul meense deenke degge moet kuiere ast we werrumer wurd.
Joa, as de zon mer innigzins zien eige löt zeen, dan trekke hordes meense ‘r op oet um de bosse onveilig te make. Veul neme doabi-j nog unne ho-nd mej en dan wurd ‘r gewoon midde op de poad geloëpe! Ni langs de ka-nt of achter mekaor. Nieje, ze loëpe of de helle werreld van hun is!
En ze hebbe nerregus gen errug in! Echt ni.

Meense, deenkt us unne kiër èn al die kwot en moterriejers!
Die rieje ni alliën mer door de bosse en de velde ast werrum weer is.
Die trekken ‘r och op oet ast wa kawwer is of ast wa règent.
Want as ut weer zoewa minder is, dan ziede al die wandelaars ni.
Dan ist inens ni mer zoe noëdig.
Prima, mer got dan op z’n minst èn de ka-nt loëpe zoedè de kwots er gewoon door kunne!
Kuiere? HOE IST?
Wanne kwots!

Ut joar is wer begonne.
We zitte in 2009 en zoeas ut och huurt hebbe we nottörluk ammel wer hel wa goei veurnemes.
Wa hawt dè eigeluk ammel in?
D’n enne get minder oetgève.
Alliën koëpe wa ge echt noëdig het.
D’n a-ndere get minder ète.
Of miër zelluf koke in plats van ète gon hoale.
Of minder roëke.
Misschien zellufs ermej stoppe.
Iërder noa bed.
Ni zoeveul licht loate branne.
Wa miër vur aander meense doën.
Miër same onderneme.
Miër bewege.
Te voët goan.
Minder dreenke.
Minder op stap.
De wage wa iërder loate stoan.
Ni zoe gaauw unnen a-ndere koëpe.
Wa miër de fiets pakke.
Ni zoveul gokke en wedde.

Mer iën gokje wil ich wel woage vur 2009:

Wedde det nog nuit zoe seempel is gewist um oweige èn ow veurnemes te hawwe
as in KREDIETKRIEZUSJOAR 2009 !!

Wie ut dizze kiër ni volhawt, kan bèter gen goei veurnemes hebbe!

HOE-IST?

Kiek:
Dè we moete belle as we erreges op de koffie gon.
Dè we ni zoemèr bie iederiën aachterum kunnen kome.
Dè we gen postkuntoer mer hebbe en dezze bie de baank livver hebbe degge alles zelluf duut.
Dè we ‘r ni zoemèr vanoet kunne goan dè hel Zurrik mejduut mej ut ni-jjoarzinge.
Degge nerregus nimmer mugt roëke.
Dè we un vergunning moete hebbe as we un tènt in d’n hoof zette vur ut fest.
Dè we ni in de böskes meuge pisse och al moete we nog zoe errug.
Degge in törrep owwe jas mej kwiet bent asser wa te doën is.
Degge niks mer van andermans jong mugt zegge.
En dè we ozze wage en fiets goe moete sloete.
Dè we as we pinne de hand erbove moet hawwe zoedè nimmet ut ziet.
Dè we de veur- en aachterdeur op slowet moete doën.
Och wete we dè we de knipbeurs kwiet zien, as we die erreges loate ligge.
Dè wete we nottörluk al langer as vandaag.

MER DEWWE IN ZURRIK VORT GEWAPENDE OVERVALLE HEBBE, DES NI-J !!

HOE-IST?

Wa kumter oppos aaf??????

Hel de werreld is in de ban van de kredietcrisis. Banke dörreve elkoar niks mer te liëne. De èndiële zien over un paar wèke niks mer werd ast zoe door get. Gementes die gewoon gaeld van de börregers op banke zoemer erregus ter werreld zette en ze vervolleges dè gaeld kwiet zien. Kan gebeure zegge ze dan, de belastinge umhog en er is niks èn de hand. D’r is nerregus gen gaeld mer vur. Veriënigingen kriegen minder subsidie, prieze gon umhog van gas, woater, licht, zekenkas en ozb. Ut is gaeld is op.
Vervolleges lès ich in de Grenskoerier dezze bie ut kustilke Cranendonck iets gon make vur de ALPENWATERSALAMANDER!
Now zit ich alzelève op internet, dus umdè ich gen idee heb wa ich mich veur moet stelle bie zoene vogel google ich dè efkes um te kieke of ‘r iets te vinne is over
de leste ALPENWATERSALAMANDER ter werreld
(die now net in os eige Zurrik achter ut gementehoes zit!)

De Alpenwatersalamander staat in Nederland niet op de rode lijst en wordt niet beschermd door enige Europese wetgeving. Door de International Union for Conservation of Nature and Natural Resources wordt de salamander beschouwd als veilig.

As ge dan lest detter bekand in ieder land in Europa van die besjes zitte dan deenk ich un örste instantie:
DOA MOET IEMUT IETS DOEWEN VUR UT TE LOAT IS!
Iemut moet die meense tegehawwe die ut gewicht verkiërd legge, vur ut loat is.

Doaluk ist te loat?

HOE-IST?!
Hoe loat kan ‘t eigeluk wore?

Unne houthakker stet in ‘t bos hout te kappe kumt er inens unne indiaan èn. De houthakker drejt zich um en vrogt of ‘t unne strenge winter wurd want indianen wiëte dè. Now zigt die indiaan, ich deenk van wel… now deenkt die houthakker, ich kap nog wel wat bi-j. Kumt wer die indiaan langs … zeg indiaan, wurd dizze winter unne strenge winter… jah zigt de indiaan.. ut wurd zeker unne strenge winter. Now deenkt de houthakker, loat ich mer fleenk doorkappe dan. De volgende daag ligt er unne gruwelijke stapel en wer kumt de indiaan langs en wer vrogt de houthakker of ut unne strenge winter wordt…. joa zigt de indiaan. ut wurd zeker unne strenge winter, volges mich de strengste die we uit gehad hebbe. Maar …vrogt de houthakker, ich vroag mich al ‘n paar daag aaf hoe gi dè wet.. Now zigt de indiaan, as ich kie-k noa die stapel hout die gi èn ut kappe bent!!!! 
Doa moet ich steeds èn deenke as ich al die verhale lè-s ovver de financiële merrut. Nimmet wet watter er stet te gebeure, mer iederiën lupt iederiën achternoa terwiele dezze al dor diezelfde achternoageloëpe wore. Umdè nimmut iets wet zal d’n aandere ut wel wete.
Lemmingen, allemol lemminge!
Meense, ‘r is niks èn de ha-nd zoelang ge ow eige ding duut!
Mer euh…zout unne strenge winter wore Lemming?

HOE-IST?

Vannewèk zaag ich op de tillevisie un programma wo ze onderzeuke wa ‘r ammel in ète zit. Now ging ut ‘r over wa vur kè-s detter op pietza zit. Wa bleek now? Op de meste pietzas zit genne kè-s. Ut liekt ‘r op en ut vult èn as kè-s mer ut is ‘n mix van allerlei spul dè eigeluk niks mej kè-s te make hit. Zellufs bie MacDonalds, zitter ‘r mer vur de helluft kè-s in de kè-s!
Op de radio was gistere iemut die ut haauw ovver hout. Veul hout dè wurd gekapt, kumt oet gebiede wo ze eigeluk ni zonder dè hout kunne. Mèr ze hebbe toch vort zoen keurmèrruk zeej ‘r enne. Joa, ‘r is wel un keurmerruk zigt die mins mer dè wil nog lang ni altied zegge dè ut hout ni oet iejen of aander regenwoud kumt.
As ge in de weenkel iets kopt wo genne so-ker in zit, zit ‘r mestal ‘n zoetstof in die nog veul slèchter is!
Ge kopt unne kipfilet, bliekt die vur de helluft oet woater te bestoan!
Ge wilt persé unne Citroën, kopde unne auto die bie Peugeot gemakt wurd!
In Zjuderansj mej vruchtvles hebbe ze alliën mer wa minder woater bie de pulp gedoan!
Zedde de iën wè-k de grieze en de a-nder wè-k de greune kontèner boete, bliekt dè bekannt de helluft van de gementes alles op enne hoëp goje!
Kiekde noa un kwis op tillevisie, huurde ternoa dè ut ammel gespult is!
Ziede dè Amerika zoe trefzeker is mej hun ni-j bomme in Irak, vertelle ze noaderhand detter mer 5% doel hit gerakt!
Gefde unne euro èn un goei doel, hoeve ze doavan mer un döbbeltje daadwerkeluk èn dè doel te besteje!
Reageerde op ‘n contactadvertènsie bliekt dien aandere al getrouwd te zien!
Kriegde un mailtje as waarschuwing vur un kompjoetervirus, is now net dè mailtje ut virus!
As ge bie un arbeidsbureau werrukt en ge duut fleenk ow bè-st, make ze ooch dudelik dè as alle werkloze werruk hebbe, gi wekeloos bent!
Zeen ze dè in de overgaank noa ut joar 2000 alle kompjoeters op hol zouwe sloan, gebeurt ‘r net hellemol niks!
Ge wet tiggeworig ni wa ge moet geluweve!

HOE-IST?
Ich geluwef nog mèr iën ding.
Dè ich ‘r schie-t van krie-g!

Gelöft dè mèr!

Tiggeworig mugde nerregus nimmer roëke.
Ni? Nieje!
Alliën boete. Dus alle kuffees zien leeg en de terrasjes vol.
Teminste, mej moi weer. Want ast slecht weer is dan blieft iederiën toes.
Vurrige wèk was ich op un fesje in ‘n zoal in Buul. En druk detter was. En gezellig. Joa echt.
Ut örste hallef uur dan, want toen begon ut wa te kriebele bij de helluft van ut vollek.
D’n enne noa d’n aandere kapde ut gesprek aaf um boete te gon roëke. Binnne moesten ‘r nogal wa unnen aanderen gesprekspartner zeuke en boete ging ut eigenluk alliën mer over ut ni binne meuge roëke. Noa un menuut of 10 kwaamp ut wer zoewa binnegedröppeld mer d’n toën vur d’n aovund was in feite gezet. Vur de rest van d’n aovund was de sfeer eigenluk un bitje kepot. Op ut fest was ‘r enne die ich nogal us uit tegekwaamp joare geleje toen ich nog regelmatig en frequent int kuffee te vinne was. Wa rakden èn de proat en op un gegève momeent ha-n we’t ovver roëke en de Duitse soldoate in Buul, van de legerplats die in ozzen tied och veul op stap ginge. Die soldoaten rokden bekant allemol doa ware we’t ovver èns, mer hej zeej dè die soldoaten eigeluk vurnameluk rokden umdè ge dan ni zoe goe hun zwiët kost ruke umdè ze op bivak gewist ware. Ooch hadde ni mej in de goate as ze un scheet ha-n geloate. En as ze wer trug op de legerplats kwame dan moog och nimmet al te overdudelik ruke dezze nogal wa pilskes gedroonke ha-n dus doa holp de roëk och goe vur. Mer umdèt in feite ni um ut roëke geenk waren ze’r noow moi kloar mej gewist. Ich zeg hoezoe dan?
Now zigtie: Now moesten ze kieze tusse BINNE: wo ‘r ni gerokt wurd,
of BOETE: wodet enne grotte wallem is.
Wa zowwe die soldoate gekoze hebbe in dizzen tied bie d’n Donkey:

Nicht rauchen      oder    So ein Mist

Ich deenk dè Piet Paulusma ut wel errug hèndug kriet in de toekomst:
Meestig of Règen
HOE-IST?